文章目錄
第一部分：授權步驟
步驟 1：入「管理員 → 存取權和安全性」
喺左邊欄最底撳 管理員，再撳 存取權和安全性。 （英文介面：Admin → Access and security；亦可以直接開 https://ads.google.com/aw/accountaccess/users）
步驟 2：喺「用戶」分頁撳藍色「＋」
入到之後，確認你係喺 用戶（Users） 呢個分頁，然後撳右上角嘅藍色 ＋ 圓形按鈕。
步驟 3：輸入我哋嘅電郵，揀「標準」
- 「電郵地址」入面，完全照抄 我哋俾你嘅電郵地址 (freshdesignhk@gmail.com)（唔好加空格、唔好打錯字，否則邀請會寄錯人）
- 「存取權級別」揀 標準（Standard）
- 撳 傳送邀請
步驟 4：確認揀啱咗「標準」
下拉選單一共有 5 個級別。請揀 標準 —— 唔好揀「唯讀」（我哋改唔到廣告），亦唔需要揀「管理員」。
步驟 5：見到「待處理」就完成咗你嗰邊
傳送之後，清單會多咗一行，狀態顯示 待處理。我哋收到電郵、撳「接受」之後，狀態就會自動變成 已啟用，通常 1 個工作天內。
小提示：如果隔日仲係「待處理」，麻煩截張呢一頁嘅圖俾我哋，通常係電郵地址打漏咗字。
第二部分：「標準」權限我哋做到啲乜？做唔到啲乜？
「標準」係 Google 官方定義嘅級別，唔係我哋自己定。簡單講：廣告投放做得晒，帳戶控制權仲係喺你手。
我哋做得到：開／改廣告系列、關鍵字、廣告文案、預算同出價；睇同匯出所有成效報告；根據 Google Analytics 活動建立轉換。
我哋做唔到：加人入帳戶、改任何人嘅權限級別、接受或拒絕經理帳戶連結、將帳戶連結去 Google Analytics 匯入轉換、新增或移除產品連結。
第三部分：關於「第三方／產品連結」（重要）
呢一點要先講清楚：Google 規定「新增或移除產品連結」只有「管理員」級別先做得到，「標準」係做唔到嘅。所謂產品連結，包括 Google Analytics (GA4)、Merchant Center、Search Console、YouTube 頻道，同埋第三方報表／追蹤工具嘅連結。
所以如果我哋今次需要幫你接駁呢類平台，有兩個做法揀一個：
做法 A（推薦）：你保持授權我哋「標準」，需要連結嗰陣我哋開個 15 分鐘視像會議，由你嘅管理員帳戶撳幾下，我哋喺旁邊教你點揀。連結一次過設定好，之後日常投放都唔會再碰到。
做法 B：你暫時將我哋嘅級別調做「管理員」，我哋一次過設定晒所有連結，做完即刻通知你，你隨手調返落「標準」（做法見最後一段）。
第四部分：另一個選擇 —— 經理帳戶（MCC）連結
如果你將來會同我哋做長期投放，亦可以用「經理帳戶連結」代替逐個電郵加人：我哋用公司嘅經理帳戶（MCC）發連結要求，你喺 管理員 → 存取權和安全性 → 經理 分頁撳「接受」就得，之後我哋成隊 team 都連得到，唔使逐個同事加。
留意：接受經理帳戶連結等於俾咗管理層級嘅權限。如果你只係想我哋做投放，用上面第一部分嘅「標準」用戶邀請就已經足夠。兩個方法揀一個做就得，唔需要兩樣都做。
第五部分：想改級別或者收回權限？隨時做得
去返 管理員 → 存取權和安全性 → 用戶：
- 改級別：將滑鼠移到「存取權級別」嗰欄，撳出現嘅箭咀就可以改（例如管理員調返標準）
- 收回：喺同一行「動作」欄撳 移除存取權，即刻生效
收回權限唔會影響你嘅廣告數據、廣告系列或者帳單，亦唔需要事先通知任何人。
常見問題
唔使。由頭到尾都係你用自己帳戶發邀請俾我哋嘅公司電郵，我哋用自己嘅 Google 帳戶登入。任何人叫你俾 Google 密碼，你都應該拒絕。 我搵唔到「管理員」呢個選項。 即係你嗰個登入唔係帳戶管理員。請搵返開戶嗰位同事，或者最初收 Google Ads 帳單嗰個電郵地址。
睇到，而且你嘅權限完全冇變。你係管理員，隨時睇到我哋改咗啲乜（管理員 → 變更記錄）。
唔會。付款方式同帳單資料維持喺你嘅帳戶，廣告費直接由你嘅信用卡／付款方式扣。
用同一個流程，級別揀「唯讀」就得。
